ویب ډیسک
طالبانو امريکا او اروپايي هيوادونو ته اطمينان ورکړی چې دوی په افغانستان کې د واک انحصار نه غواړي بلکه د دوی دريځ دا دی چې د افغانستان ستونزې بايد د خبرو له لارې هوارې شي.
قطر کې د طالبانو د سياسي دفتر وياند نعيم وردګ وايي, د طالبانو د مذاکراتي پلاوي مرستيال شيرمحمد عباس ستانکزي او ورسره پلاوي د ويډيو کنفرانس له لارې د امريکا , اروپايي اتحاديې , ملګرو ملتونو بريتانيا, جرمني او ناروې هيوادونو ځانګړو استازو غونډې ته په وينا کې ويلي, چې طالبان د واک انحصار نه غواړي بلکه له پيله يې دريځ دا و چې د افغانستان ستونزې بايد د خبرو له لارې حل شي.
طالبانو همداراز د اسلام او افغاني عنعناتو په چوکاټ کې د ښځو حقونو ته له ژمنتيا او د ملي ګټو او شريعت په چوکاټ کې د بيان د ازادۍ له تضمين ډاډ ورکړی.
دا په داسې حال کې ده چې د امريکا, ملګرو ملتونو او د اروپايي هيوادونو ځانګړو استازو په يوه اعلاميه کې په افغانستان کې د زور له لارې د طالبانو له قدرت ته رسېدلو سره مخالفت څرګند کړ.
