ویب ډیسک
د ملګرو ملتونو د ماشومانو ملاتړ صندوق یا یونیسف وايي، په افغانستان کې په هرو ۴۰ میندوارو مېرمنو کې یوه یې په زېږون مري.
یونیسف د روغتیا نړیوالې ورځې په مناسبت په خپاره کړي راپور کې ویلي، چې د نړیوالو بشري مرستو کمښت په ټوله نړۍ کې د میندوارو مېرمنو د مړینې کچه لوړه کړې چې افغانستان هم پکې شامل دی.
د یاد سازمان د اټکل له مخې په ۲۰۲۳ کال کې په ټوله نړۍ کې ۲۶۰ زره مېرمنې د میندوارۍ یا زېږون پر مهال مړې شوې دي، چې په هرو دوو دقیقو کې د یوې مېرمنې د مړینې اټکل کېږي.
د راپورونو له مخې پر افغانستان د طالبانو له واکمنۍ وروسته روغتیايي سکټور زیانمن شوی او دا زیان له هغې وروسته د مور او ماشوم روغتیا ته د پاملرنې برخو کې زیات شو، چې متحده ایالاتو خپلې بهرنۍ مرستې بندې کړې دي.
د معلوماتو له مخې د طالبانو د بنديزونو له امله د روغتيايي خدمتونو په وړاندې کولو کې د دې ډلې ناتواني، د روغتيايي مرکزونو، درملو او تجهیزاتو کمښت، وچکالي او او پراخه بې وزلي هم په هېواد کې د روغتیايي ناورین پیدا کېدو لامل ګڼل کېږي.
طالبانو تراوسه د ملګرو متلونو د راپورونو په تړاو څه نه دي ویلي، خو یونیسف له نړیوالو بنسټونو او هېوادونو غوښتي، چې د افغانستان سربېره په ټوله نړۍ کې د روغتايي بحران قابو کولو لپاره مرستې زیاتې کړي.
# #Afghanistan #Health #UN #UNICEF
