ویب ډیسک
رائټرز خبر ورکړی چې د پاکستان او افغانستان پوځونو د جمعې په ورځ د خپلو پولو په لسګونو ځایونو کې یو پر بل ډزې وکړې. ملګرو ملتونو ویلي چې د یوې اوونۍ جګړې له امله له یو لک څخه زیات خلک له خپلو کورونو بېځایه شوي دي.
دواړه هېوادونه د وروستیو کلونو تر ټولو سختې جګړې کې ښکېل دي او د روغې جوړې هېڅ نښه نه ښکاري. دا وضعیت په داسې وخت کې رامنځته شوی چې په سیمه کې د ایران پر ضد د امریکا او اسراییلو بریدونه هم روان دي. ایران له افغانستان او پاکستان دواړو سره ګډه پوله لري.
په جګړه کې د پاکستان هوايي بریدونه هم شامل دي چې د طالبانو د حکومت ځینې پوځي ځایونه یې په نښه کړي، لکه د کابل ښار شمال ته لویه هوايي اډه.
د روژې د ماښام پر مهال پر کورونو مرمۍ
د افغانستان د دفاع وزارت ویلي چې د طالبانو ځواکونو د پولې په اوږدو کې د پاکستان پر پوځي ځایونو له شلو څخه زیاتو سیمو کې بریدونه کړي، څوارلس پوستې یې ویجاړې کړې او یوه بېپیلوټه الوتکه یې هم غورځولې ده.
د دوی په وینا، د شپې په جګړه کې اووه افغان ملکي وګړي او درې د طالبانو جنګیالي وژل شوي دي.
بل لور ته د پاکستان امنیتي سرچینو ویلي چې دوی ځمکنۍ او هوايي حملې کړي او پوځي هدفونه یې په نښه کړي دي، په ځانګړي ډول کندهار ښار چې د طالبانو مهم مرکز بلل کېږي، او هلته یې څو سرحدي پوستې له منځه وړې دي.
په کابل ښار کې لسګونه کسان د پاکستان د بریدونو پر ضد لاریون ته راوتلي او د پاکستان پر ضد یې شعارونه ورکړي دي. همدارنګه د لغمان په ولایت کې هم خلکو اعتراضونه کړي دي.
خلک د روژې د افطار پر مهال تر اور لاندې
د سرحدي سیمو اوسېدونکي وايي چې پوځونه اکثره د لمر له لوېدو وروسته درنې مرمۍ تبادله کوي، هغه وخت چې کورنۍ د روژې د افطار لپاره کښېني.
یو پاکستانی مزدور چې د تورخم په ښارګوټي کې اوسېږي وايي چې هغه له خپلې کورنۍ سره کډه شوې او اوس د خپلو ملګرو په کور کې ژوند کوي.
هغه وویل:
«کله چې سهار له کوره ووځو، پر موږ مرمۍ اورېږي. مرمیو زموږ کورونه زیانمن کړي او زموږ ټول سامانونه هم هلته پاتې دي.»
لسګونه زره بېځایه شوي
د ملګرو ملتونو د کډوالو ادارې ویلي چې د افغانستان او پاکستان تر منځ وضعیت ډېر کړکېچن دی او د پولې په اوږدو کې جګړه روانه ده. د دوی په وینا شاوخوا یو لک او پنځلس زره کسان په افغانستان کې او درې زره کسان په پاکستان کې له خپلو کورونو بېځایه شوي دي.
د خبرو اترو نشتوالی
که څه هم ځینو هېوادونو د اوربند لپاره د منځګړیتوب وړاندیز کړی، خو تر اوسه هېڅ رسمي خبرې نه دي پیل شوې.
د پاکستان د حکومت ویاند ویلي چې د جګړې د پای لپاره خبرې نه کېږي او ترهګري باید پای ته ورسېږي. د هغه په وینا د پاکستان مسوولیت د خپلو خلکو ساتنه ده.
دا جګړه تېره اوونۍ هغه مهال پیل شوه کله چې پاکستان د افغانستان دننه هوايي بریدونه وکړل او ویې ویل چې د وسلوالو پټنځایونه یې په نښه کړي دي. افغانستان دا بریدونه د خپلې خاورې د واکمنۍ خلاف بللي او د غچ اخیستلو عملیات یې اعلان کړي دي.
پاکستان وايي چې افغانستان هغو وسلوالو ته پناه ورکوي چې له هغه ځایه په پاکستان کې بریدونه کوي، خو د طالبانو حکومت دا تورونه رد کړي او ویلي یې دي چې په پاکستان کې ناامني د هغه هېواد خپله داخلي ستونزه ده.
