د خیبر پښتونخوا د مومند ولسوالۍ په یکه غنډ سیمه کې د پولیسو پر ګزمه کوونکي موټر د وسلوالو له لوري برید شوی، چې له امله یې د پولیسو دوه سرتېري وژل شوي او یو بل سخت ټپي شوی دی.
د پولیسو د معلوماتو له مخې، برید د پنجشنبې شپې د مچني په سیمه کې د ورسک لفټ کانال ته نږدې شوی دی. چارواکي وایي، وسلوالو پر ګزمه بوختو پولیسو ډزې وکړې او پولیسو هم ورسره متقابل ځواب ورکړ.
د راپور له مخې، په وژل شویو کې د یکه غنډ د پولیسو د مرکز مرستیال مسؤل (اېډېشنل اېس اېچ او) زیت الله او د ایلیټ ځواک سرتېری نورزیب شامل دي، او د پولیسو موټر چلوونکی ظاهر سخت ټپي شوی، چې د لومړنۍ درملنې وروسته د نورو درملنو لپاره پېښور ته لېږدول شوی دی.
پولیس ادعا کوي چې د نښتې پر مهال وسلوالو ته هم مرګژوبله اوښتې، خو د دې ادعا خپلواکه تایید نه دی شوی. د پولیسو په وینا، بریدګر د تېښتې پر مهال یوه ایم فور ټوپک، یوه کلاشنکوف او درې ډک شاجورونه پرېښي دي.
د پېښې له رامنځته کېدو وروسته امنیتي ځواکونه سیمې ته رسېدلي، سیمه یې کلابنده کړې او د لټون عملیات یې پیل کړي دي. چارواکي وایي، د بریدګرو د موندلو لپاره هڅې روانې دي.
بل لور ته، د وژل شویو پولیسو د جنازې مراسم د جمعې په سهار د غلنۍ پولیسو په لیکو کې د رسمي مراسمو په ترڅ کې ترسره شول، چې پکې د پولیسو او ملکي ادارو یو شمېر چارواکو ګډون کړی و.
پولیسو ویلي، په سیمه کې به امنیتي عملیات دوام ولري، خو د پېښې په اړه د وسلوالو له لوري تر اوسه کومه څرګندونه نه ده شوې.
