راپور: داود جبارخیل
د افغانستان د فراح ولايت ځايي مسوولین وایي، د راستنېدونکو کورنیو لپاره ۱۰۸ نوي کورونه جوړ او ګټې اخیستنې ته وسپارل شول.
د چارواکو په وینا، د دغې پروژې ټول لګښت شاوخوا ۵.۵ میلیونه ډالر دی، چې د یوې خیریه مؤسسې له خوا تمویل شوی.
یو ځايي چارواکي، چې نه یې غوښتل نوم یې واخیستل شي، وویل: «دا کورونه هغو کورنیو ته ځانګړي شوي چې له کلونو بېځایۍ وروسته بېرته خپلو سیمو ته ستنې شوې دي او د سرپناه له جدي ستونزې سره مخ وې.»
چارواکي زیاتوي چې دا پروژه د راستنېدونکو د بیا مېشتېدو د اسانتیا لپاره عملي شوې او هڅه کېږي چې ورته نورې پروژې هم پلي شي.
بل لور ته، یو شمېر عیني شاهدان او ګټه اخیستونکي وایي چې دا کورونه د هغوی لپاره یو مهم ګام دی، خو لا هم بنسټیزو اسانتیاوو ته اړتیا شته.
یو تن راستنېدونکی، چې تازه ورته کور سپارل شوی، وایي: «موږ کلونه په کډوالۍ کې تېر کړل. اوس که څه هم کور لرو، خو د اوبو، برېښنا او کار ستونزې لا هم شته.»
ځینې نور اوسېدونکي ټینګار کوي چې د کورونو تر څنګ باید د کارموندنې، روغتیا او زدهکړو په برخو کې هم پاملرنه وشي، څو راستنېدونکي وکولای شي باثباته ژوند ولري.
