ويب ډیسک
د امریکا د متحدوایالتونو د خزانې وزارت پر طالبانو له لګېدلو بندیزونو څخه پر معافیتونو رڼا اچولې.
د امریکا د خزانې وزارت په یوه بیان کې چې پرون د سلواغې په ۱۳مه خپور شو ویلي دي چې نړیوال بانکونه د بشري مرستو لپاره افغانستان ته پیسې انتقالولای شي او زیاتوي چې مرستندویې ټولنې اجازه لري له دې بندیزونو څخه د سرغړونې له وېرې پرته، د افغانستان د دولتي بانکونو له لارې د ښوونکو او روغتیاپالانو معاشونه اجرا کړي.
په بیان کې همداراز د طالبانو او په تور لیست کې د شاملې حقاني شبکې غړو ته د پیسو د انتقال پر جواز هم رڼا اچول شوې چې له مخې یې د افغانستان خلکو ته د مستقیمو مرستو، د وارداتو د سمون او د دفترونو د شریکولو په ګډون د عمومي مرستو د رسولو د همغږۍ په هدف له دوی سره په مستقیم ډول د موافقو لاسلیک هم پکې شامل دي.
د بیان له مخې د بشري مرستو د رسولو لپاره د مالیو، محصول، پر وارداتو د مالیو یا د نورو مالیاتي خدماتو په هدف بانکونه له هغو مالي موسسو سره هم راکړه ورکړه کولای شي چې طالبان او حقاني شبکه په سلو کې له ۵۰ زیاته ونډه پکې لري.
