ویب ډیسک
د ايران ولسمشر ابراهيم رئيسي د سپتمبر په لومړۍ نېټه د دغه هېواد د کابينې په يوه غونډه کې د افغانستان د حالاتو په اړه ويلي، تاريخ څو څو ځله دا ثابته کړې، چې په نورو هېوادونو او سيمو کې د امريکا موجوديت د نړۍ د امنيت، ثبات او سولې د خرابېدو سبب ګرځيدلی دی.
نوموړي وويل، د امريکا له لوري په تېرو ۲۰ کلونو کې په افغانستان کې رامنځته شوی بشري بحران پر بشري حقوقو څرګند تيری دی، په دغه هېواد کې ګڼ شمېر ښځې او ماشومان وژلي او ډېر يې ټپيان او معيوب کړي، په افغانستان کې د امريکايي ځواکونو شتون نه يوازې په دغه هېواد کې سوله او ثبات را نه وستل، بلکې امنيت، ثبات او سوله يې هم پکې سبوتاژ کړي وو.
