ویب ډیسک
افغانستان حکومت ویلي چې په کابل کې پر پاکستاني جټ الوتکو ډزې کړې ، وروسته له هغه چې د یکشنبې په ورځ د پلازمېنې په بېلابېلو برخې چاودنو او ډزو ښار ولړزاوه. دا وضعیت په داسې حال کې رامنځته شوی چې سیمه د امریکا او اسراییلو له لوري پر ایران بریدونو او په ځواب کې د خلیج هېوادونو کې پر امریکايي هدفونو د ایران له بریدونو وروسته لا هم بې ثباته ده.
د طالبانو تر واک لاندې افغانستان ویلي چې پاکستان په تېره اوونۍ کې پر دولتي تاسیساتو بریدونه کړي، وروسته له هغه چې اسلاماباد تور پورې کړ چې کابل وسلهوال پناه کوي؛ خو افغانستان دا تورونه رد کړي دي.
د دواړو ګاونډیو هېوادونو ترمنځ په وروستیو کلونو کې تر ټولو سختې نښتې دا اندېښنه راپورته کړې چې ښايي د ۲۶۰۰ کیلومتره اوږدې پولې په اوږدو کې اوږدمهاله شخړه رامنځته شي. یو شمېر هېوادونو، لکه قطر او عربستان، د زغم غوښتنه کړې او د اوربند منځګړیتوب ته یې چمتووالی ښودلی دی.
د رویټرز یوه عیني شاهد ویلي چې د سهار له لمر ختو مخکې د کابل په ځینو سیمو کې د چاودنو غږونه واورېدل شول، چې وروسته پرې پرلهپسې ډزې وشوې. لا تر اوسه روښانه نه ده چې کوم هدفونه په نښه شوي او یا مرګژوبله شته که نه.
ایران، چې له افغانستان او پاکستان دواړو سره ګډه پوله لري، مخکې یې د خبرو اترو د اسانتیا وړاندیز کړی و، خو خپله د شنبې په ورځ د اسرئیل او امریکا له بریدونو سره مخ شو، چې موخه یې د ایران د پوځي وړتیا کمزوري کول بلل شوي دي.
تورونه او تاوتریخوالی
پاکستان ویلي چې افغانستان د تحریک طالبان پاکستان وسلهوالو ته پناه ورکوي، چې د پاکستان دننه بغاوت پر مخ وړي.
افغانستان دا تورونه رد کړي او ویلي یې دي چې د افغانستان خاوره د نورو هېوادونو پر ضد نه کارول کېږي او د پاکستان امنیتي ستونزې د هغه کورنۍ موضوع ده.
پاکستاني امنیتي سرچینو ویلي چې د “غضب للحق” په نوم عملیات روان دي او پاکستاني ځواکونو د افغانستان پوستې او کمپونه ویجاړ کړي دي.
دواړو لورو د درنو تلفاتو راپور ورکړی، خو د یو بل لپاره یې بېلابېلې شمېرې وړاندې کړې دي. رویټرز ونه توانېد چې دا ادعاوې په خپلواکه توګه تایید کړي.
ډیپلوماتیکې هڅې چټکې شوې دي؛ روسیه ، عربستان ،یورپ ،چین او ملګري ملتونه د زغم غوښتنه کړې او د خبرو اترو غږ یې کړی دی.
امریکا ویلي چې د پاکستان د ځان دفاع حق ملاتړ کوي. د پاکستان د دفاع وزیر خواجه اصف دغه جګړه “ښکاره جګړه” بللې ده.
د افغانستان د کورنیو چارو وزیر سراج الدین حقاني ویلي چې دا شخړه به “ډېره ګرانه بیه” ولري. هغه زیاته کړه چې دا مهال یوازې سرحدي ځواکونه په جګړه کې ښکېل دي او هېواد لا خپل ټول پوځ نه دی ځای پر ځای کړی.
