ويب ډیسک
د مې پر څلورمه په پاریس کې د فرانسې ولسمشر اېمانوېل میکرون او هندي وزيراعظم نرېندرا مودي ترمینځ تر ملاقات وروسته په ګډ بیان کې د یوه سوله ییز او باثباته افغانستان کلک ملاتړ څرګند شوی دی.
دوی ټيڼګار کړی چې د افغانستان له خاورې څخه د نړۍ نورو برخو ته د ترهګرۍ خپرېدل باید هېڅ و نه زغمل شي.
په افغانستان کې د طالبانو حکومت هم په بیا بیا ويلي چې د افغانستان ځمکه به د هېڅ يوه هېواد پرضد استعمالېدو ته نه پرېږدي.
له بیان سره سم، هند او فرانسې په افغانستان کې د یوه ټولشموله حکومت د جوړېدو ترڅنګ د ښځو، نجونو او لږکيو د حقونو د درناوي غوښتنه کړې ده. دا هغه مهمې غوښتنې دي چې نړیوال یې د طالبانو د حکومت په رسمیت د پېژندلو لپاره وړاندې کوي.
د ۲۰۲۱ز کال د اګست په نیمايي کې پر افغانستان د طالبانو له واکمنېدو راهیسې تر اوسه د نړۍ هېڅ یوه هېواد د هغوی حکومت په رسمیت نه دی پېژندلی.
