ویب ډیسک
د طالبانو لخوا د نجونو پر زدهکړو له بندیز وروسته د اسلامي همکاریو سازمان سرمنشي د طالبانو د دې پرېکړې پر وړاندې د اسلامي نړۍ د علماؤ او دیني بنسټونو د یووالي لپاره د نړیوال کمپاین غوښتنه کړې.
حسین ابراهیم طه پرون د دیسمبر په ۲۹مه د اسلامی فقهې د نړیوالې اکاډمۍ دفتر دویمې غونډې پرانسته کې د اسلامی همکاریو سازمان او د اسلامی فقهې د نړیوالې اکاډمۍ اجنډا کې د افغانستان د موضوع په لومړیتوب د ټینګار په ترڅ کې ویلي، چې د طالبانو دغه پرېکړه د اسلامي شریعت د ماخذونو پر بنسټ نه ده.
نوموړي زیاته کړې، چې د جون په میاشت کې د علماؤ یوې ډلې افغانستان ته سفر وکړ او له علماؤ او طالب مشرانو سره یې پراخې ناستې وکړې، په ترڅ کې یې پر دې توافق وشو، چې اسلام د ښځو ټول حقوق، د زدهکړې او کار حق په ګډون تضمینوي.
د اسلامي همکاریو سازمان له دې وړاندې د نجونو پر زدهکړو د بندیز د لیرې کولو غوښتنه کړې وه او ویلي یې ؤ چې دا پرېکړه به افغان نجونې او ښځې له خپلو اساسي حقونو د زدهکړو، کار او ټولنیز عدالت نه بېبرخې کړي.
دا په داسې حال کې ده چې طالبانو دې وروستیو کې په ټولو پوهنتونونو او ښوونیزو مرکزونو کې د ښځو او نجونو پر زدهکړو او په کورنیو او بهرنیو نادولتي موسسو کې یې پر کار کولو بندیز لګولی چې ګڼ غبرګونونه یې راپارولي دي.
