ويب ډیسک
د ملګرو ملتونو د بشردوستانه مرستو همغږي کوونکي (اوچا) وايي چې د اګست مياشتې له لومړي نېټې څخه په افغانستان کې د سختو ورښتونو او سېلابونو د راوتلو له امله ۱۱۸ تنو خپل ژوند له لاسه ورکړی دی.
د اوچا د راپور پر بنسټ، د اګست له ۱۶مې تر ۲۱مې نېټې پورې ناڅاپي سېلابونو يوازې د ۶۳ کسانو ژوند په کنړ، لغمان، لوګر، ميدان وردګ، ننګرهار، نورستان، پکتيا او پروان ولايتونو کې واخيست او د ښځو او ماشومانو په ګډون ۱۱۵ تنه يې ټپيان کړل. سربېره پر دې په لوګر، ميدان وردګ او پروان ولايتونو کې ۳۰ تنه لادرکه شوي دي.
د اوچا په راپور کې چې تېره ورځ خپور شو، راغلي، چې په تخمينې ډول په لوګر، ميدان وردګ او پروان ولايتونو کې د سېلابونو له امله ۳۳۹۸ کورونو ته زيان اوښتی او يا نړېدلي دي او په ۱۳ ولايتونو کې ۸۲۴۶ کورنيو زيان ليدلی دی.
اوچا ويلي، چې د مرستندويه بنسټونو څو ډلې، د سيمو د ارزونې او د مرستو د وېش په پار چمتو شوي دي.
