ویب ډیسک
د اتصالات شپږیزه کرکټ لیګ اتم پړاو سیالیو په لړ کې نن دوه لوبې ترسره شوې، چې په لومړۍ لوبه کې افلاک فیضي بست ساتونکو د ۴ منډو په توپیر کټوازي مس عینک اتلانو او په دویمه لوبه کې ایوبي کابل بازانو د رحمان الله ګربز د په زړه پورې توپوهنې پر مټ رپیډ پې هندوکش ستوري لوبډلې ته د نهه ویکټو په توپیر ماتې ورکړه او د شپږیزه لیګ روانو لوبو کې یې خپله پنځمه بریا ترلاسه کړه.
رپیډ پې هندوکش ستوري لوبډلې د سیالۍ پچه وګټله او لومړی یې خپله توپوهنه ترسره کړه، چې په ټاکل شویو ۲۰ اورونو کې یې د ۱۸۳ منډو هدف وټاکه. یادې لوبډلې ته ذبید اکبري په ۵۲ توپونو ۸۳ ناسوځېدلې او لوبډلمشر حضرت الله ځاځي په ۱۷ توپونو ۳۰ منډې ترسره کړې. باید ووایو چې د ایوبي کابل بازانو په ګټه قیس احمد او حسیب الله لکڼوال د ۳۲-۳۲ منډو په ورکولو سره هر یوه ۲-۲ او ولید ستانکزي بیا د ۴۰ منډو بدل کې ۲ ویکټې ترلاسه کړې.
د هندوکش ستورو لخوا ورکړل شوي هدف پسې کابل بازانو د رحمان الله ګربز او ابراهیم ځدراڼ په ښکلې لوبې غوره پیل واخیست، چې د لوبې ۱۴م اور کې یې هدف پوره او په ۹ ویکټو توپیر یې بریا خپله کړه.
د کابل په توپوهنه کې لوبډلمشر رحمان الله ګربز د ۴۸ توپونو په لوبولو ۱۲۱ منډې جوړې کړې او په ۴۰ توپونو یې د روانې شپږیزې لیګ چټکه سلیزه ترلاسه کړه. بلخوا د یادې لوبډلې لپاره مسعود ګربز په ۱۵ توپونو ۲۷ ناسوځېدلې او ابراهیم ځدراڼ په ۲۲ توپوتو ۲۵ منډې جوړې کړې. د هندوکش په ګټه مسلم موسی د ۲۷ منډو بدل کې یو لوبغاړی د لوبې له ډګره بهر کړ.
د نننۍ سیالۍ د غوره، لوبې بدلوونکي او زیاتو شپږیزو جایزې رحمان الله ګربز ته او د لوبې د ډوولي لوبغاړي جایزه ذبید اکبري ته ورکړل شوه.
د اتصالات شپږیزه کرکټ لیګ اتم پړاو سیالیو په روان بهیر کې به سبا سهار لومړۍ لوبه د ډیوه ګروپ پامیر زلمي او امو نهنګانو او دویمه لوبه به د سنګین سپین غر پړانګانو او ساپي برادرز بند امیر ښامارانو ترمنځ ترسره شي.
