ويب ډیسک
افغانستان له زیمبابوې څخه د دریمې شل اوریزې لوبې په ګټلو سره دغه لړۍ هم درې صفر وګټله. تر دې دمخه افغانستان له یادې لوبډلې څخه د پنځوس اوریزو نړیوالو لوبو سیریز هم درې صفر ګټلی وو.
په دریمه شل اوریزه لوبه کې د ټاس تر ګټلو وروسته افغانستان د توپ وهنې پریکړه وکړه. که څه هم د تیرې لوبې په پرتله افغانستان خپلې سیالې لوبډلې ته لوړ هدف و نه ټاکه او په ټاکل شوو شلو اورونو کې یې د اتو لوبغاړو په سوځیدو سره زیمبابوې ته د ۱۲۶ منډو هدف وټاکه. د افغانستان له لوري محمد نبي په ۳۰ توپونو ۳۱ منډې وکړې.
د افغانستان بالرانو د خپل هدف کلکه دفاع وکړه او زیمبابوې د نهو لوبغاړو په سوځیدو سره ۹۰ منډې وکړې او افغانستان دغه لوبه په ۳۵ منډو وګټله. د افغانستان له لوري په نننۍ لوبه کې ځوان توپ اچووونکی نور احمد لکڼوال چې دا یې لومړۍ نړیواله شل اوریزه لوبه وه، ډیر ښه وځلید او د خپلې سیالې لوبډلې څلور لوبغاړي یې وسوځول. شرف الدین اشرف هم دوې ویکټې واخیستې. فضل الحق فاروقي او راشد خان هم یو، یو لوبغاړی وسوځاوه.
