ويب ډیسک
د پاکستان د انرژي وزارت یوه چارواکي پاکستاني رسنیو ته تایید کړې ده چې آسیايي پراختیايي بانک له ترکمنستان څخه د افغانستان له لارې پاکستان او هند ته د ګاز د لېږد د پروژې یا ټاپي اړوند ټول فعالیتونه درولي دي.
نیوز انټرنېشنل خپرونې د پاکستان د انرژي د وزیر خبره رااخیستې ده چې وایي د دې بانک له خوا د ټاپي پروژې د تمویل چارې دریدلې دي. آسیايي پراختیایي بانک ویلي دي د دې پرېکړې علت دا دی چې ملګروملتونو د طالبانو حکومت په رسمیت نه دی پیژندلی.
طالبانو په دې وروستیو کې هیله څرګنده کړې وه چې د ټاپي عملي چارې به ډېر ژر پيل شي. د طالبانو حکومت شاوخوا دوه اونۍ مخکې ویلي و، چې په کابل کې د ترکمنستان سفیر خواجه عوض اوف ته د ټاپي امنیتي طرحه سپارل شوې ده.
د ټاپي پلایپلاین اوږدوالی 1814 کیلومترو ته رسېږي او د بشپړېدو په صورت کې به هرکال تر ۳۳ میلیارډ مکعب متر پورې طبیعي ګاز له ترکمنستانه د افغانستان له لارې پاکستان او هند ته انتقالوي. آسیايي پراختیایي بانک ویلي دي چې له یوشمېر نورو هېوادونو سره په ګډه به د افغانستان د وضعیت څارلو ته دوام ورکړي.
