د پاکستان او سریلانکا د کرېکټ ملي لوبډلې به نن، د اکتوبر پر نهمه، په راولپنډۍ کې د درې شل اوریزو نړیوالو سیالیو د لړۍ په لومړۍ لوبه کې سره مخامخ شي.
ټاکل شوې چې لوبه د پاکستان په وخت د ماښام پر شپږو بجو پیل شي.
پاکستان لوبډلې ته د صاحبزاده فرحان د مشرۍ دنده سپارل شوې ده. نوموړي د روان کال په شل اوریز نړیوال جام کې د ډېرو منډو په جوړولو پام ځانته اړولی و. د پاکستان لوبډله په دې لړۍ کې له هغو لوبغاړو هم ګټه اخلي چې په دې وروستیو کې یې په اسیایي لوبو کې ګډون کړی دی.
بل لور ته، د سریلانکا لوبډله د کوسل مېنډیس په مشرۍ لوبېږي. خو د دې لوبډلې پیاوړی توپ اچوونکی ونیندو هسرنګا د ټپي کېدو له امله په دې سفر کې له لوبډلې سره نه دی.
د دواړو لوبډلو ترمنځ وروستۍ دوه اړخیزه شل اوریزه لړۍ په ۲۰۱۹ کال کې په پاکستان کې ترسره شوې وه، چې سریلانکا په کې پاکستان ته درې پر صفر ماتې ورکړې وه. دا یوازینۍ شل اوریزه لړۍ وه چې پاکستان په خپله خاوره کې ټولې لوبې بایللې وې.
د کرېکټ د شنونکو په اند، د نننۍ لوبې پایله به د دواړو لوبډلو د اوسني چمتووالي او د نویو لوبغاړو د وړتیاوو په څرګندولو کې مهم رول ولري.