د پاکستان د کورنیو چارو وزیر سید محسن نقوي د ایران پلازمېنې تهران ته د ناڅاپي سفر پر مهال د ایران د کورنیو چارو له وزیر اسکندر مومني سره ولیدل، چې پکې د دواړو هېوادونو ترمنځ د دوه اړخیزو اړیکو، سرحدي امنیت او سوداګرۍ د پراختیا په اړه خبرې وشوې.
دواړو لورو د پولې هاخوا سوداګرۍ، ټرانزیټ او د مالونو د تګ راتګ د اسانتیاوو پر ښه کولو ټینګار وکړ او ویې ویل چې د ګډې پولې په اوږدو کې به اقتصادي همکاري نوره هم پراخه شي.
ایراني وزیر د پاکستان د حکومت او ولس مننه وکړه او ویې ویل چې د ایران او پاکستان اړیکې تاریخي او ورورولۍ ته ولاړې دي. هغه زیاته کړه چې دواړه هېوادونه غواړي د سوداګرۍ او اقتصادي همکاریو د پراختیا لپاره پر پوله د اسانتیاوو کچه لوړه کړي.
هغه دا هم وویل چې د دواړو هېوادونو ولسونه د یو بل په اړه مثبت نظر لري او د ایران د ستر مشر آیت الله سید مجتبی خامنه يي د پاکستان په اړه څرګندونې یې هم یادې کړې.
بلخوا، محسن نقوي د ایران له حکومت څخه د مېلمه پالنې مننه وکړه او ویې ویل چې پاکستان او ایران د دوه اړخیزو اړیکو، سرحدي مدیریت او سوداګرۍ اړوند مسئلو د عملي حل لپاره ګډ کار کوي.
هغه زیاته کړه چې په دې تړاو به له نورو ایراني چارواکو سره خپلې نورې لیدنې هم روانې وساتي.
