ويب ډيسک
یوې معتبرې حکومتي سرچینې ویلي، چې پاکستاني حکومت لخوا وړاندې شوي نامعقول او د افغان حکومت او نړېوالو اصولو خلاف شرطونه نه دي منل شوي.
یاده سرچینه وايي، چې د تورخم دروازه به تړلې پاتې وي او په دې اړه ننګرهار کې د افغان حکومت ناسته د پاکستان نامعقولو شرطونو په نه منلو پای ته رسېدلې ده.
د سرچینې د معلوماتو له مخې د تورخم خلاصون په اړه د پاکستان یو اساسي شرط دا و، چې باید د فرضي کرښې دې غاړې ته د نظامي تاسیساتو جوړول ودرېږي، هغه چې افغان چارواکي دا شرط د ملي او نړېوالو اصولو خلاف او د افغانستان په خاوره کې لاسوهنه بولي.
د افغانستان د ننګرهار ځايي مسؤلین وايي، چې د پاکستان وړاندي شوي شرطونه د قوانینو خلاف دي او هیڅکله به ونه منل شي.
د یادونې وړ ده، چې د تورخم دروازه نږدې یو میاشت کېږي چې د پاکستان لخوا تړل شوې ده او لامل یې د کرښې دې غاړې ته د افغان پوله ساتو ځواکونو لخوا د نظامي تاسیساتو جوړول بولي.
