ويب ډيسک
د بلوچستان په تربت سیمه کې ښکار ته د ورغلو قطري شیخانو پر کاروان باندې د سړک د غاړې بم ور چاودلی چې په نتیجه کې یې د دوی د امنیت ساتونکي ملېشه ځواک دوه پوځیان وژل شوي خو وایي قطري شیخانو ته زیان نه دی رسېدلی.
د بلوچستان دوو حکومتي چارواکو وویل، یو کاروان چې د قطري شاهي کورنۍ غړي پکې شامل وو د صوبې له تربت ښاره بهر یې سفر کاوه چې ورباندې چاودنه وشوه.
د تربت ضلعې یو انتظامي چارواکی عبدالحمید وایي، “په چاودنه کې د فرنټېرکور [ملېشه ځواک] دوه پوځيان ووژل شول او څلور نور پوځیان ټپیان شوي دي”.
د خلیج هیوادونو د اشرافو د کورنیو پر ښکار مین کسان هر کال په ژمي کې د بلوچستان بلوڅ مېشتو سیمو ته سفر کوي، چې د بازانو په وسیله د هوبارا یا څاړي په نامه نایاب مرغان ونیسي.
