ويب ډيسک
د پاکستان پخوانی لومړی وزیر عمران خان، چې اوس په زندان کې دی، د اسلام اباد د حکومت ګواښ په افغانستان کې د پوځي بریدونو د ترسره کولو لپاره «احمقانه» بللی دی.
ښاغلي خان په اېکس پاڼه کې زیاته کړه چې «له افغانستان سره د اړیکو بیا رغول زموږ بیړنۍ اړتیا ده.»
د پاکستان پخواني لومړي وزیر هم ویلي، چې د هېواد پوځ به د ا.ا له ملاتړ پرته د ترهګرۍ پر ضد جګړه نه شي ګټلی.
د عمران دا څرګندونې په داسې حال کې شوي چې د پاکستان حکومت په دې وروستیو کې د ترهګرو ډلو په ځانګړې توګه د تحریک طالبان پاکستان پر ضد د مبارزې لپاره د «عزم استحکام» په نوم عملیات پیل کړي او د دغه هېواد پوځ هم د «عملياتو» پر عملي کېدو ټینګار کړی دی.
