بيبيسي اردو راپور ورکړی چې د افغانستان د کنړ ولایت د سپټمبر په ۲۱مه د هوايي بریدونو له وروسته د سیمې د بمونو پاتې شوني او خپاره شوي انځورونه او ویډیوګانې ارزول شوې دي.
د بيبيسي د افغانستان د فکټچېک ډلې د ارزونې له مخې، په دغو بریدونو کې د امریکا جوړ «مارک ۸۲» (Mk 82) بم کارول شوی دی.
راپور وايي، Mk 82 یو نسبتاً پخوانی هوايي بم دی چې لا هم د ګڼو هېوادونو په هوايي ځواکونو کې کارول کېږي. دغه بم په خپله اصلي بڼه یو عادي عمومي موخې بم دی، خو د بېلابېلو لارښوونکو کټونو په وسیله د دقیق هدف ویشتلو لپاره هم کارول کېدای شي.
پاکستان د سپټمبر په ۲۱مه ویلي وو چې د باوري استخباراتي معلوماتو پر بنسټ یې د افغانستان پولې ته څېرمه د پاکستاني طالبانو او اړوندو ډلو پر مرکزونو بریدونه کړي او درې هدفونه یې له منځه وړي دي.
افغانستان بیا ویلي وو چې پاکستان پر کنړ او پکتیکا هوايي بریدونه کړي، چې له امله یې د ښځو په ګډون لږ تر لږه درې کسان وژل شوي دي.
بيبيسي اردو وايي، د Mk 82 بم د کارولو په اړه یې د پاکستان د پوځ د عامه اړیکو له ادارې (ISPR) څخه هم پوښتنه کړې، خو تر اوسه یې ځواب نه دی ترلاسه کړی.