د بلوچستان د هرنایي ولسوالۍ د خوست په سیمه کې د سکرو د یوه کان د نړېدو له امله دوه کانکیندونکي مړه شوي دي.
د ماینونو د ادارې د معلوماتو له مخې، پېښه د پاکستان مایننګ انډسټري د سکرو کانونو په ساحه کې د یوه قراردادي په کان کې رامنځته شوې، چې له امله یې دوه کارګر د کان دننه بند پاتې شول.
چارواکي وایي، د کان د نړېدو له کبله دواړه کانکیندونکي په هماغه ځای کې مړه شوي وو. وروسته کارګرو د خپلو هڅو په وسیله د ژغورنې عملیات ترسره کړل او د دواړو مړي یې له کان څخه را وایستل.
د پولیسو په وینا، د مړو جسدونه نږدې روغتون ته لېږدول شوي وو. تر قانوني چارو له بشپړېدو وروسته، جسدونه د هغوی کورنیو ته وسپارل شول.
