د بلوچستان حکومت پرېکړه کړې چې پر ډاکټرې ماه نور ناصر، چې د تېزابشیندنې قرباني شوې، د لا پرمختللې درملنې لپاره یې امریکا ته ولېږي.
د وزیراعلیٰ بلوچستان میر سرفراز بګټي په لارښوونه، د وزیراعلیٰ دفتر اړوندو ادارو ته د بهرني درملنې لپاره رسمي لیک استولی دی. د وزیراعلیٰ سلاکار شاهد رند ویلي، ډاکټرې ماه نور ناصر اوس مهال د کراچۍ په آغا خان روغتون کې تر درملنې لاندې ده او دا بهیر به لا شاوخوا یوه اوونۍ دوام وکړي.
د هغه په وینا، له لومړنۍ درملنې وروسته به نوموړې د ځانګړې او پرمختللې درملنې لپاره امریکا ته واستول شي، او د دې چارې لپاره اړینې اداري چارې پیل شوې دي.
شاهد رند زیاته کړې چې د بلوچستان حکومت د اغېزمنې شوې ډاکټرې د درملنې لپاره د غوره روغتیايي اسانتیاوو برابرولو په موخه ټولې شته سرچینې کاروي.
