ویب ډیسک
پاکستان ۵۳ هغه افغان کارګر ماشومان طالبانو ته سپارلي چې له ډیورنډ فرضي کرښې د کار کولو په لټه پټ اوښتي وو.
پاکستاني رسنیو راپور ورکړی، چې یاد کارګر ماشومان د اغزن تار په غوڅولو او تورخم کې د لویو موټرو په سینو کې له کرښې پورې غاړې اوښتي وو.
د راپورونو له مخې پاکستان ته په ناقانونه توګه د افغان کارګر ماشومانو د اوښتو هڅې زیاتې شوې دي چې په منځني ډول هره ورځ ۷۰۰ ماشومان ورته هڅې کوي.
په تورخم کې د طالبانو مسوولینو تراوسه د یادو ماشومانو او کورنیو ته یې د ورسپارلو په تړاو څه نه دي ویلي.
له دې وړاندې یو شمېر راپورونه ورکول شوي وو، چې په تورخم کې کارګر ماشومان له کرښې د اوښتو پر مهال مړه او ټپیان شوي هم دي.
تورخم او سپین بولدک کې کارګر ماشومان چې په سختو کارونو بوخت دي، د خپلو ټولو بشري او انساني حقونو بې برخې کېدو ته اندېښمن دي.
خلک له طالبانو غواړي چې پاکستان ته د کارګر ماشومانو د اوښتو مخنیوی وکړي او دغلته په درنو کارونو د اخته ماشومانو لپاره د حرفوي زده کړو زمینې برابرې کړي.
# #Torkham #NGR #Afghanistan
