د پاکستان حکومت ویلي چې د امریکا او ایران ترمنځ د لوړې کچې کمېټې لومړنۍ غونډه، چې د اسلاماباد د تفاهملیک په چوکاټ کې د سویس په بورګنشټوک ښار کې جوړه شوې وه، په بریالیتوب پای ته رسېدلې ده.
د پاکستان د لومړي وزیر شهباز شریف په وینا، په دغو خبرو کې ګډونوالو د یوې وروستۍ هوکړې لپاره د ۶۰ ورځني مهالوېش پر جوړولو، د سیاسي څارنې لپاره د لوړې کچې کمېټې پر رامنځته کولو او د تخنیکي خبرو د دوام پر پیل هوکړه کړې ده.
هغه ویلي، خبرې په مثبت او رغنده چاپېریال کې ترسره شوې او دواړو لورو د ډیپلوماسۍ او خبرو اترو د دوام ژمنتیا څرګنده کړې ده.
شهباز شریف د قطر او سویس له حکومتونو مننه کړې او ویلي یې دي چې دغو هېوادونو د خبرو د ترسره کېدو لپاره مهم رول لوبولی دی.
نوموړي همداراز د پاکستان د پوځ د مشر فیلډ مارشال عاصم منیر، د بهرنیو چارو وزیر او مرستیال لومړي وزیر اسحاق ډار او د کورنیو چارو وزیر محسن نقوي هڅې ستایلې دي.
د پاکستان لومړي وزیر ټینګار کړی چې هېواد به یې د سیمهییز او نړیوال سولېز حل لپاره د خبرو اترو او ډیپلوماسۍ په برخه کې خپل رول ته دوام ورکړي.
