د سند ایالت د شکارپور ولسوالۍ په بودو والیساباد کلي کې د محرم د ماتم مراسمو پر مهال د برېښنا د سختې پېښې له امله اته کسان وژل شوي او لږ تر لږه ۱۵ نور سخت ټپیان شوي دي.
د راپورونو له مخې، دغه پېښه هغه مهال رامنځته شوه چې د ماتمي مراسمو ګډونوالو یو لوی علم پورته کاوه او د علم سر د لوړ ولتاژ برېښنايي مزي سره ولګېد. عیني شاهدان وایي، له تماس سره سم د علم نیوونکو چیغې پورته کړې او ګڼ کسان د برېښنا له شاک سره مخ شول.
پولیس وایي، علم خپل توازن له لاسه ورکړ او د ۱۱ زره ولټه برېښنايي مزي پر لور ورواوښت. د پېښې له امله اته کسان وژل شوي او تر ۱۵ ډېر نور د برېښنا د شاک او سوځېدو له کبله ټپیان شول.
ژغورنې ډلې، پولیس او سیمهییز اوسېدونکي د مرستې لپاره ورغلل او ټپیان یې نږدې روغتونونو ته ولېږدول. د ځینو ټپیانو روغتیایي وضعیت نازک ښودل شوی او د لا ښه درملنې لپاره د شکارپور، لاړکانه او سکر روغتونونو ته انتقال شوي دي.
د وژل شویو کسانو پېژندنه هدایتالله، عبدالوحید، محمد خالد، محمد زاهد، شفیق احمد، دین محمد، ارباب او محمد حسن په نومونو شوې ده.
دغه پېښې په سیمه کې د غم او خواشینۍ فضا خپره کړې ده. چارواکو د پېښې د څرنګوالي د معلومولو لپاره پلټنې پیل کړې دي.
د سند د کورنیو چارو وزیر ضیاءالحسن لنجر پر پېښه ژوره خواشیني څرګنده کړې او اړوندو ادارو ته یې د ټپیانو د غوره درملنې او د مرستندویه چارو د چټکتیا سپارښتنه کړې ده. نوموړي همداراز د محرم د مراسمو او د علمونو د درولو پر مهال د خوندیتوب د لا پیاوړو تدابیرو غوښتنه کړې ده.
