ويب ډیسک
څو شېبې وړاندې د کابل ښار په پنځلسمه ناحیه کې د استقلال هوټل مخې ته چاودنه وشوه.
د طالبانو د کابل د امنيه قوماندانۍ وياند د پېښې پخلی کړی او ويلي يې دي، چې د لومړنيو معلوماتو پر بنسټ يو تن ټپي شوی دی.
خو یوه سرچینه وايي، چې دوى څو مړي ليدلي، چې طالبانو په خپلو رینجرونو کې انتقال کړل.
د سرچينې د معلوماتو له مخې، دغه چاودنه د کابل هوايي ډګر ته څیرمه د استقلال هوټل مخې ته هغه مهال وشوه، چې نن د يکشنبې په ورځ د طالبانو د پخواني مشر ملا اختر محمد منصور د وژل کېدو د شپږم تلين په مناسبت پکې غونډه جوړه شوې وه.
تر دې دمه د چاودنې د څرنګوالي، مرګ ژوبلې او هدف په اړه نور جزئیات نه دي په ډاګه شوي.