د بلوچستان اسمبلۍ غړی مولانا هدایت الرحمن غواړي په دغه ایالت کې د سردارۍ نظام د سمدستي ختمولو او په خبرو او لیکنو کې د «سردار» او «نواب» لقبونو د کارولو د منع کولو پرېکړهلیک وړاندې کړي.
د ورکړل شویو معلوماتو له مخې، د بلوچستان اسمبلۍ غونډه به د پنجشنبې په ورځ د سهار پر ۱۱ بجو ترسره شي او نوموړی به په کې یاد پرېکړهلیک وړاندې کړي.
مولانا هدایت الرحمن به په ملي لویو لارو کې د پېښو پر مهال د ژغورنې او بېړنیو مرستو د خدمتونو د ښه کولو په اړه هم د پام رااړولو خبرتیا وړاندې کړي.
په غونډه کې به د جمعیت علمای اسلام غړی زبید علي ریکي د ډالي–ماشکېل او ډالي–بسیما سړکونو د جوړولو او بیارغونې وړاندیز وکړي. د همدې ګوند غړې شاهدې رؤف به په بلوچستان کې په ټولو دولتي ښوونځیو کې د عربي ژبې د اجباري مضمون ګرځولو پرېکړهلیک وړاندې کړي.
د اسمبلۍ د عامه حسابونو کمېټې مشر اصغر علي ترین به هم د بلوچستان پوهنتون د پشین څانګې ته د بشپړ پوهنتون د حیثیت ورکولو وړاندیز وکړي.
همداراز، د شمالي ډېره بګټۍ په سیمه کې د میر غلام قادر بګټي په نوم د «ښوونځي د غورهوالي» د جوړولو اړوند قانوني مسوده به هم غونډې ته وړاندې شي. د ښځو د پراختیا او انرژۍ څانګو اړوند پوښتنې به هم مطرح او ځواب شي.