ويب ډیسک
د پاکستان د ګمرک یو چارواکي خبرداری ورکړی چې د لارو په بندیدو سره ښايي پاکستاني توکي «د تل لپاره» د افغانستان بازار له لاسه ورکړي، ځکه چې افغان سوداګرو د اړینو توکو د واردولو لپاره ایران ته مخه کړې.
د افغانستان او پاکستان لارې د تېرې اونۍ په پېل کې د موټرچلوونکو لپاره د پاسپورټ او ویزې د محدودیت له کبله تړل شوې دي.
پاکستانۍ ډان رسنۍ خبر ورکړی چې له میوو، سبزیو او نورو خرابیدونکو توکو بار تر ۱۰۰ زیاتې لارۍ له تورخمه پېښور ته ستنې شوې دي.
د پاکستاني ګمرک د ترخیص مسوول مجیب الله شینواري ډان نیوز ته ویلي، چې د پاکستان او ایران ترمنځ د سرحدي ترینګلتیاوو او همداراز د افغان موټرچلوونکو لپاره د ویزې د سیاست په اسانه کولو کې د یو شمېر پاکستاني چارواکو د نه لیوالتیا له کبله د تورخم د خلاصولو لپاره هڅې کمې شوي.
نوموړي ویلي، چې یو شمیر افغان موټرچلوونکي او کلینران یې له معتبرو ویزو سره-سره بند پاتې دي او د یو شمیر پاکستانیانو باروړونکي موټرونه هم هغه لور ته بند پاتې دي، سره له دې چې اړین اسناد لري.
دې پاکستاني چارواکي ویلي، چې د لارو بندیدو میلیاردونه کالدارې زیان اړولی دی.
ده خبرداری ورکړی چې پاکستاني توکي ښايي د تل لپاره د افغانستان بازار ګاونډیانو ته وبایلي، ځکه چې ګڼ شمېر افغان سوداګرو له وړاندې لا خپلو ایراني سیالانو ته د اړینو توکو د چمتو کولو ویلي دي.
ځايي سوداګر قاري نظم ګل چې په دې وروستیو کې له افغانستانه راستون شوی، ډان ته یې ویلي، چې د جلال اباد بازار له ایراني توکو په ځانګړې توکه خوراکي توکو ډک دی.
د ده په وینا، کابل کې هم دوکانونه ایراني توکي وړاندې کوي.
ده ادعا کړې چې له پاکستان سره د سوداګرۍ تر بندیدو وروسته ایران په چټکۍ خپل توکي پلازمیني کابل ته رسولي دي.
دې سوداګر ټینګار کړی چې پاکستان حداقل د دریو میاشتو لپاره د باروړونکو موټرو افغان چلوونکو لپاره د ویزې د محدودیت له لېرې کولو پرته بل انتخاب نه لري.
ده زیاته کړې: «د زیات زیان د مخنیوي لپاره وخت ته اړتیا ده، تر څو افغان موټرچلوونکي پاسپورټونه واخلي او سوداګر او ټرانسپورټ کوونکي په خپلو موټرو کې بار بارونه افغانستان ته ورسوي.»
