د افغانستان واکمن حکومت د دفاع وزارت ویلي چې د دغه وزارت هوايي ځواکونو تېره شپه د بلوچستان او خېبر پښتونخوا په بېلابېلو سیمو کې د داعش اړوند څو مرکزونه په نښه کړي دي.
د وزارت په خبرپاڼه کې راغلي چې یاد مرکزونه د افغانستان پر ضد د بریدونو د طرحې او تنظیم لپاره کارېدل او د ګلستان، شکرآب او قمبرخېل په سیمو کې تر برید لاندې راغلي دي.
د خبرپاڼې له مخې، له مخکې ټاکل شوي هدفونه په بریالیتوب سره ویشتل شوي دي.
د دفاع وزارت همداراز ټینګار کړی چې افغانستان به د خپل امنیت او ثبات پر وړاندې هېڅ ډول ګواښ ونه مني او د شته امکاناتو په کارولو سره به د دغو ګواښونو د شنډولو او له منځه وړلو لپاره اقدام وکړي.
د دې ادعاوو په اړه تر اوسه د پاکستاني چارواکو یا نورو خپلواکو سرچینو غبرګون نه دی خپور شوی.
