ویب ډیسک
له پاکستان څخه د افغانانو د را ایستلو په دوام، د دغه هېواد د جمعیت علمای اسلام ګوند مشر، مولانا فضلالرحمن په خپل حکومت غږ کړی چې هلته مېشت افغانان ډلبندي کړي او په دوی کې د پانګوالو له ایستلو ډډه وکړي.
نوموړي د یوې غونډې ګډونوالو ته ویلي چې د پاکستان له بانکونو د افغانانو د پانګې ایستل د دغه هېواد په زیان دي او همداراز افغان زدهکړیالان هم باید ونه ایستل شي.
په راپورونو کې د مولانا فضلالرحمن له قوله خبرداری ورکړ شوی چې د افغانانو ایستل به د کابل او اسلاماباد پر اړیکو منفي اغېز وکړي.
د پاکستان د جمعیت علمای اسلام ګوند مشر دا څرګندونې وروسته له هغې کړې چې له یاد هېواد څخه د ټولو افغانانو د ایستلکېدو په اړه راپورونه خپاره شوي دي.
ویل کېږي چې د پاکستان حکومت به د سپتمبر میاشتې په لومړۍ نېټه د افغانانو د ایستلو بل پړاو پیل کړي.
له پاکستان څخه د افغان کډوالو جبري ایستلو که څه هم وخت ناوخت پراخ نړیوال غبرګونونه پارولي، خو پاکستاني چارواکو د کډالو ایستل خپل قانوني حق بللی او د ټولو کډوالو پر ایستلو یې ټینګار کړی دی.
د ویلو ده چې له تېرو څو میاشتو راهیسې له ایران څخه هم سلګونه زره افغانان په جبري توګه را ایستل شوي دي.
