ويب ډیسک
ټولګټو وزارت د کندهار د ارغنداب ولسوالۍ د هغه وران شوي پله پر بیا رغونه کار پیل کړ چې د روان کال د وري میاشتې پر ۴مه نېټه د وسله والو مخالفینو له خوا د یوه موټر بم په وسیله ویجاړ شوی و.
دغه پُل ټولټال ۱۷۲ متره اوږدوالی او ۱۰ متره پلنوالی لري چې د چاودنې پر مهال یې ۴۰ متره برخه ویجاړه شوې وه.
ټولګټو وزارت د یاد پله د تخنیکي او تدارکاتي پړاونو تر سره کولو وروسته پرون د غبرګولي په ۲۶مه نېټه د ارغنداب پله پر ورانه شوې برخه د بیا رغونې کار پیل کړ، چې په جوړېدو سره به یې د ارغنداب د مشهورو آنارو دا ښکلې ولسوالي بېرته له کندهار ښار سره ونښلي.
