ويب ډيسک
اېن بي سي نیوز د سرچینو په حواله راپور ورکړی، احتمال لري چې د متحده ایالاتو منتخب ولسمشر ډونلډ ټرمپ د هغو افسرانو لپاره نظامي محكمه جوړه کړي چې له افغانستانه د امریکایي ځواکونو د وتلو په پروسه کې ښکېل دي.
د دغه راپور پربنسټ، د ټرمپ د واک د لېږد ټیم د هغو پخوانیو او اوسنیو امریکايي پوځي افسرانو لېست چمتو کوي چې له افغانستانه په وتلو کې مستقیماً ښکېل وو او ښايي پوځي محکمې ته د ځواب ویلو لپاره حاضر شي.
یوې باخبرې سرچینې د يادې طرحې په اړه دغه خبری شبکې ته ویلی چې «له افغانستانه د وتلو په تړاو تورونه له امریکا سره د خیانت تر حده»مطرح دي.
له بلې خوا دغې خبري شبکې ویلي چې د ډونلډ ټرمپ د واک د لېږد ټیم په پام کې لري چې د ۲۰۲۱ کال په اګست میاشت کې له افغانستانه د امریکايي ځواکونو د وتلو په اړه د بیا کتنې لپاره یو کمېسیون جوړ کړي.
ياد راپور د سرچینو په حواله ویلي چې د نشه يي توکو او نړیوالو ګواښونو سره د مبارزې په برخه کې د دفاع وزارت پخواني مرستیال معاون مټ فیلن به د دې کمېسیون مشري پرغاړه ولري.
