ویب ډیسک
د بشري حقونو په برخه کې د بريتانيا استازي ويلي دي چې هيواد یې په افغانستان کې د بشري حقونو جدي ننګونو په ځانګړي توګه د ښځو او اقلیتونو سره د زور زیاتي په اړه اندېښنمن دی.
د بشري حقونو له پاره د بریتانيا سفیرې او په ملګرو ملتونو کې د دغه هیواد د دایمې استازي مرستیالې ریتا فرينچ د بشري حقونو شورا ته په وینا کې ويلي دي چې داسې باوري راپورونه شته چې د ۲۰۲۱م کال په اګست کې واک ته د طالبانو تر رسیدو وروسته د ټولو افغانانو له پاره د بخښنې اعلان ته درناوی نه کیږي او د بشري حقونو سرغړونې دوام لري.
هغې ويلي دي چې افغانان د امن ژوند حق لري او د بشري حقونو د سرغړونو پېښو د څیړلو غوښتنه کوي: «د ډارولو، ورکیدو او بې عدالتي وژنو جدي تورونه باید په شفاف ډول وڅیړل شي.»
په ژنيو کې د بریتانیا دغه استازي وایي، له افغانانو سره به یې لاسنیوی او مرستې دوام ولري او بریتانیا سږ کال ۲۸۶ میلیونه پونډه ژمنه کړې، چې د لومړنیو بشري اړتیاو سره مرسته وکړي چې د ژوند ژغورنې په دې مرسته کې ښځې مهم رول لري.
دغه بریتانوۍ استازې په افغانستان کې د نجونو پر مخ د منځیو ښوونځیو د بندیدو په اړه هم اندېښنه څرګنده کړې ده او ویلي یې دي چې افغانستان په نړۍ کې یوازینی هېواد دی، چې نجونو یې ښوونځي ته نه پریښودل کیږي.
