د خیبر پښتونخوا د کرم ولسوالۍ د لوئر کرم په سرې غوړګې سیمه کې د بارودي ګولۍ د لګېدو له امله د یوې کورنۍ شپږ غړي ټپیان شوي دي.
د روغتیايي مرکز د معلوماتو له مخې، په ټپیانو کې څلور ښځې، یوه نجلۍ او یو نارینه شامل دي. ټپیان د ځايي خلکو له لوري د مندوري روغتیايي مرکز ته انتقال شوي دي.
د معلوماتو له مخې، په پېښه کې ایاز، د هغه مېرمن ګل پرېزه، مور یې ګل مینه، ورېندار یې نیاز مینه او دوه ورېرې یې یسره او ثنا ټپیان شوي دي.
وروسته د ټل د ژغورنې ۱۱۲۲ ادارې یوه امبولانس مندوري ته ورسېد. ایاز، چې روغتیايي حالت یې نازک ښودل شوی، پېښور ته ولېږدول شو، او پاتې پنځه ټپیان د نورو درملنو لپاره ټریژري روغتون ته ور وپېژندل شول.
د سیمې قومي مشر ملک حاجي محمد کریم ویلي، په سیمه کې د بېړنیو روغتیايي او ژغورنیزو خدمتونو د نشتوالي له امله د ټپیانو د انتقال پر مهال ستونزې رامنځته شوې دي.
د نوموړي په وینا، د سیمې خراب سړکونه هم د روغتیايي خدمتونو د رسېدو او د ټپیانو د لېږد پر وړاندې ستونزې زیاتوي.
ځايي اوسېدونکو د ژغورنې ۱۱۲۲ خدمتونو د برابرولو او په سیمه کې د روغتیايي مرکز د شپې د خدمتونو د پیل غوښتنه کړې ده.