ويب ډيسک
پر افغانستان د طالبانو واکمنېدو درېیمې کلیزې په مناسبت د افغان ښځو د عدالت غوښتنې ټولنې له نړیوالې ټولنې غوښتي چې له طالبانو سره د تعامل بهیر پای ته ورسوي.
دغو مېرمنو پنجشنبه د زمري پر ۲۵مه په یوې ویناپاڼې کې لیکلي چې له طالبانو سره د نړیوالې ټولنې پټې ناستې او هوکړې په دغه هېواد کې له بشري حقونو د سرغړاوي لامل شوې دي.
نوموړي خوځښت یادونه کړې چې طالبانو د تېرو درېیو کالو په لړ کې د افغان ښځو پر کار او ژوند څه باندې ۷۲ محدودونکي فرمانونه صادر کړې دي.
د یاد خوځښت په ویناپاڼې کې راغلي: «د طالبانو له خوا د سولهییزو راټولېدونو تاوتریخجن ځپل، شکنجې، وژنې او له بشري حقونو سرغړونې ډېرې شوې دي.»
له دې وړاندې د افغان ځواکمنو ښځو غورځنګ بشري حقونو په ځانګړې توګه د افغان ښځو حقونو ته د نړیوالو د پاملرنې غوښتنه کړې وه.
