ویب ډیسک
د ایران اسلامي جمهوري دولت د دفاع وزارت پخوانی مرستيال وزیر علي رضا اکبري چې په جاسوسۍ تورن ؤ، نن شنبه د مرغومي ۲۴مه نېټه اعدام شو.
د ایران د قضايه قوې د رسنيو مرکز ويلي، چې ايراني الاصله برتانوی علي رضا اکبري د انګليس دولت اطلاعاتي دستګاه ته د جاسوسۍ له لارې د هېواد کورني او بهرني امنيت پر ضد د اقدام په تور په اعدام محکوم شوی ؤ.
د ایران د بشري حقونو سازمان وايي، د ایران حکومت له لوري د ټولو اعدامونو موخه د وېرې رامنځته کول دي. دغه سازمان د ایران حکومت له لوري د علي رضا اکبري اعدامول له اروپايي هېوادونو يو ډول باج ګيري اخيستل ګڼي ترڅو پر دغه هېواد سياسي فشارونه کم کړي.
د برتانيا صدراعظم ريشي سونک دغه اقدام محکوم کړی او دا یې يو بې رحمه اقدام ګڼلی دی.