د امریکا ولسمشر ډونالډ ټرمپ ویلي، که ایران د هغه د ترور یا د ترور د هڅې په اړه هر ډول ګواښ عملي کړي، متحده ایالات به سمدستي او په پراخه کچه پر ایران توغندیز برید وکړي.
ټرمپ دغه څرګندونې په خپلې ټولنیزې شبکې کې کړې او زیاته یې کړه چې د امریکا پوځ د اړتیا په صورت کې د هر ډول پوځي اقدام لپاره بشپړ چمتووالی لري.
نوموړي تر دې مخکې هم ویلي وو چې دی د هغو کسانو په سر کې دی چې د ایران د احتمالي برید هدف ګرځېدلی شي.
بل لور ته، د امریکا د رسنیو د راپورونو له مخې، اسراییل واشنګټن ته داسې استخباراتي معلومات سپارلي چې ګواکې ایران په وروستیو کې د ټرمپ پر ضد د احتمالي برید یوه طرحه ارزولې ده. خو د دې ادعا خپلواکه تایید نه دی شوی.
په همدې حال کې، د ایران د پخواني مذهبي مشر د جنازې په مراسمو کې د ټرمپ پر ضد شعارونه او پلاکارډونه هم لیدل شوي وو، چې په ځینو کې د هغه د وژل کېدو غوښتنه شوې وه.
تر اوسه ایراني چارواکو د ټرمپ د تازه څرګندونو په اړه رسمي غبرګون نه دی ښودلی.
