ایراني دولتي رسنیو ادعا کړې چې د ایران د ستر مشر علي خامنهيي د شپږ ورځنیو جنازې او تعزیې په مراسمو کې د ۴۱ تر ۴۳ میلیونو کسانو ګډون کړی دی. د دغو رسنیو په وینا، دا د ایران په تاریخ کې له تر ټولو لویو ولسي غونډو څخه یوه بلل کېږي.
د الجزیرې د راپور له مخې، د ایران دولتي ټلوېزیون «پریس ټي وي» ادعا کړې چې د علي خامنهيي د جنازې مراسم د نړۍ په کچه له تر ټولو سترو جنازو او ولسي لاریونونو څخه وو.
د راپور له مخې، د تعزیې او جنازې مراسم د ایران او عراق په پنځو ښارونو، تهران، قم، نجف، کربلا او مشهد کې ترسره شول او د مراسمو په بېلابېلو پړاوونو کې ګڼ شمېر خلکو ګډون وکړ.
رسمي مراسم تېره اوونۍ د تهران له ستر مذهبي کمپلکس څخه پیل شول، چېرې چې خلکو د تابوت وروستۍ لیدنه وکړه. له هغې وروسته په بېلابېلو ښارونو کې د جنازې او تعزیې لاریونونه ترسره شول.
د مراسمو پر مهال امنیتي تدابیر هم سخت شوي وو او ګڼو ګډونوالو د مذهبي او ملي مشرانو سره د خواخوږۍ او درناوي څرګندونه وکړه.
خو د ګډونوالو په اړه د ایراني رسنیو خپاره کړي شمېرې تر اوسه د خپلواکو سرچینو له خوا نه دي تایید شوې، او هېڅ نړیوالې ادارې هم په دې اړه رسمي ارقام نه دي خپاره کړي.
شنونکي وایي، دا مراسم د ایران لپاره مذهبي او سیاسي اهمیت درلود او ایراني چارواکو د خلکو پراخ ګډون د ملي یووالي د نښې په توګه وړاندې کړی دی.
