ويب ډیسک
د سیند های کورټ وکیل قادر خان ویلي دي چې د رېنجرز ځواک سرتېرو یې پر کور چاپه وهلې او هلته یې د ده ښځه او ماشومان ځورولي دي.
نوموړي د جنورۍ پر اوومه سهار مشال راډیو ته وویل، د رېنجرز ځواک سرتېرو دجنورۍ پر اوومه سهار وختي شاوخوا درې بجې د هغه پر کور د چاپې پرمهال د ده مشر زوی له ځان سره بیولی وو خو وروسته یې خوشې کړ.
قادر خان زیاتوي چې د چاپې پر وخت دی په کور کې نه وو. نوموړي دا و نه ویل چې سرتېري یې کور ته ولې ورغلي ول.
موږ د قادر خان د دعوې په اړه په کراچۍ کې د رېنجرز ځواک له ویاند سره رابطه وکړه خو ورسره په خبرو و نه توانېدو.
هلته د زړې سبزي منډیۍ تاڼې د پولیسو یوه چارواکي هم له پېښې ناخبري ښوولې او وايي، په اړه یې معلومات غونډوي. خو د سیند د وکیلانو ټولنې د پېښې غندنه کړې ده او نن (جنورۍ اوومه) یې په دې اړه غونډه هم وربللې ده.
د سیند بار کونسل یوه غړي کمال خان نن له مشال راډيو سره په خبرو کې د پېښې غندنه کړې ده.
قادر خان د کراچۍ یو پېژندلی وکیل دی چې له تېرو ۳۰ کلونو راهیسې هلته کار کوي. نوموړی د پښتون ژغورنې غورځنګ د یوه مخکښ مشر علي وزیر په ګډون د غورځنګ د یوشمېر نورو غړو مدافع وکیل دی.
د مشال راډیو په مننه
