راپور: داود جبارخیل
د خوست ولایت په بېلابېلو سیمو کې پرون مازدیګر (د جون میاشتې، ۲مه) سخت طوفان، تند باد، دروند باران او ږلۍ شوې، چې له امله یې خلکو ته د پام وړ مالي زیانونه اوښتي دي.
د سیمې اوسېدونکي وایي، د سختو بادونو او ږلۍ له کبله د استوګنې کورونو، دوکانونو، کرنیزو ځمکو، باغونو او برېښنايي تاسیساتو ته زیان رسېدلی دی. ځینې بزګران وایي، د ږلۍ له امله د مېوو او کرنیزو حاصلاتو یوه برخه هم زیانمنه شوې ده.
د زیانمنو شویو ادارو له ډلې د نن اېف اېم راډیو مسؤلین هم وایي، چې د طوفان او ږلۍ له امله د راډیو لمریزې برېښنا (شمسیانې) زیانمنې شوې او برېښنايي سیستم یې په بشپړ ډول له کاره لوېدلی دی.
د راډیو مسؤلینو په وینا، د تخنیکي تجهیزاتو د زیانمنېدو له امله د نن اېف اېم راډیو نشرات په موقتي ډول درېدلي او د ستونزو د حل او د نشراتو د بېرته پیل لپاره تخنیکي هڅې روانې دي.
بل لور ته د خوست یو شمېر اوسېدونکي وایي، وروستیو سختو ورښتونو او طوفاني بادونو نه یوازې مالي زیانونه اړولي، بلکې د خلکو اندېښنې یې هم زیاتې کړې دي. د دوی په وینا، په ځینو سیمو کې ونې راپرځېدلې، د برېښنا مزي زیانمن شوي او د تګ راتګ پر ځینو لارو هم اغېزې شوې دي.
ځايي خلک له مرستندویه بنسټونو او اړوندو ادارو غواړي، چې د زیانونو ارزونه وکړي او له هغو کورنیو او بنسټونو سره مرسته وکړي چې د وروستیو طبیعي پېښو له امله زیانمن شوي دي.
افغانستان په وروستیو کلونو کې د اقلیمي بدلون له اغېزو سره مخ دی. کارپوهان وایي، د سختو بارانونو، ناڅاپي سېلابونو، طوفانونو او ږلۍ پېښې زیاتې شوې دي، چې هر کال خلکو ته د درنو مالي زیانونو ترڅنګ ځاني تلفات هم اړوي.
د خوست اوسېدونکي ټینګار کوي چې د طبیعي پېښو پر وړاندې د مخنیوي او چمتووالي پروګرامونو پیاوړتیا، د بیړنیو مرستو چټک رسېدل او د زیانمنو شویو خلکو لاسنیوی د وخت مهمه اړتیا ده.
