ایران د جمعې په ورځ پر اسراییل او یو شمېر خلیجي هېوادونو توغندیز بریدونه کړي، چې له امله یې په ځینو سیمو کې چاودنې شوې دي او د انرژۍ او ملکي تاسیساتو ته زیان اوښتی دی. راپورونه ښيي چې په کویټ کې د تېلو یوې تصفیه خونې اور اخیستی او د اوبو د تصفیې یو مرکز هم زیانمن شوی.
بل خوا راپورونه وايي، چې د ایران په پلازمېنه تهران او د اصفهان په ښار کې هم د چاودنو غږونه اورېدل شوي دي. دا بریدونه په داسې حال کې کېږي چې د ایران، اسراییل او امریکا ترمنځ جګړه شدیده شوې او دواړه لوري پر یو بل د بریدونو تبادله کوي.
شنونکي وایي، د جګړې دوام او د مهمو اقتصادي او انرژۍ تاسیساتو په نښه کول کولای شي د سیمې امنیتي وضعیت لا پسې خراب او د نړیوالو بازارونو ثبات له ګواښ سره مخ کړي.
دا په داسې حال کې ده چې تېره ورځ د ایران پوځ ته اړوندو رسنیو خبرداری ورکړ چې په خلیجي هېوادونو کې به لسګونه مهم پلونه په نښه کړي.
