ویب ډیسک
له یوه کال ناندریو وروسته د جاپان شهزادۍ ماکو له خپل مخکیني ټولګیوال سره چې عادي وګړی دی، واده کوي. د جاپانۍ شهزادۍ له دې واده وروسته به نوموړې خپل شاهي حیثیت له لاسه ورکړي.
د شاهي کورنۍ اړوند اژانس په وینا د واده لپاره د اکتوبر ۲۶ مه نېټه ټاکل شوې. د دې واده لپاره په ۲۰۱۸ کال کې چمتوالی کېده، خو د ښاغلي کومیورو کورنۍ په هکله د اقتصادي ستونزو رپوټونو له خپرېدو وروسته د واده نېټه وځنډول شوه.
تمه کېږي چې دغه جوړه به له واده وروسته امریکا کې مېشت شي، هلته چې ښاغلی کومیورو د مدافع وکیل په توګه دنده لري.
ځايي رسنۍ د دې جوړې په هکله خورا پراخ خبري پوښښ کوي او د کیوډو خبري شبکې په رپوټ کې ویل شوي، له همدې کبله شهزادۍ په تېر کې له ذهني ستونزو سره مخامخ شوې.
د جاپان قانون له مخې له (عادي وګړي) سره له واده وروسته د شاهي کورنۍ ښځینه غړې شاهي حیثیت له لاسه ورکوي، خو نارینه غړو دغه حیثیت بیا پر ځای پاتې کېږي.
