ويب ډیسک
په هلمند ولایت کې د طالبانو ځايي چارواکو ویلي چې د هاوان د یوې ناوچاودل شوې مرمۍ د چاودنې په پایله کې لږ تر لږه پنځه ماشومان وژل شوي او دوه تنه نور ټپیان شوي دي.
د هلمند ولایت د اطلاعاتو او فرهنګ ریاست مشر عبدالباري راشد هلمندي د پیښې د پخلي ترڅنګ زیاته کړې چې په پیښه کې د وژل شویو ماشومانو عمرونه د درې او ۱۲ کلونو په منځ کې دي.
هلمندي زیاتوي چې دغه پیښه نن د جمعې په ورځ د هلمند ولایت په مارجه ولسوالۍ کې هغه مهال رامنځ ته شوه چې یادو ماشومانو د هاوان له یوې مرمۍ سره لوبې کولې.
په عین وخت کې د دې ولایت د ولایتي شورا یوه پخواني غړي احمدالله هم یاده پیښه تائید کړې او زیاتوي چې د پیښې دوه تنه ټپي ماشومان روغتون ته د درملنې له پاره انتقال شوي دي.
