ويب ډیسک
د ترکیې پولیسو د پلازمېنې انقرې په یوه کور کې د پنځو افغانانو مړي موندلي چې د چړو په ګوزارنو وژل شوي ؤ.
ترکي رسنیو د پولیسو په حواله راپور ورکړی، چې دا پنځه جسدونه له هغه وروسته موندل شوي چې د کورنۍ غړو يې له پولیسو سره اړیکه نیولې او داسې ښکاري چې دغه افغانان یوه اونۍ وړاندې د چاقو ټپونو له امله مړه شوي وي.
د انقرې د والي دفتر په خپله ټوېټر پاڼه لیکلي، چې د هغو پنځو کسانو د وژنې په اړه پلټنې روانې دي چې بهرني اتباع ګڼل کیږي.
تر اوسه د دې پېښې څرنګوالي او د قربانیانو هویت په هکله کره معلومات نشته.
د طالبانو له بیا واکمنۍ وروسته د اقتصادي ناورین او نورو ستونزو له امله ګن شمېر افغانان کډوالۍ ته اړ شوي او د ترکیې په ګډون بېلابېلو هېوادونو کې په سختو کارونو بوخت دي.
