ويب ډیسک
د کابل اېمرجنسي روغتون وايي، په هغه ښار کې د یکشنبې پر سهار د چاودنې له ځایه ۵۹ ژوبل کسان وروړل شوي دي چې یو یې پر لاره سا ورکړې ده.
روغتون د اپرېل پر درېیمه پر ټوېټر لیکلي چې له ژوبلو څخه یې ۳۳ کسان د درملنې لپاره داخل دي.
تر دې مخکې د کابل د شهزاده سرای مرستیال حاجي داد ګل ویلي ول چې په چاودنه کې لږترلږه ۲۰ کسان ژوبل شوي ول چې پکې د پینځو روغتیايي حالت خراب وو.
بلخوا د کابل د امنیه قوماندانۍ ویاند خالد ځدراڼ پر ټوېټر لیکلي چې هلته “یو غل” د پیسو تښتولو په نیت لاسي بم وغورځاوه. د ده په وینا، طالبان هڅه کوي چې تورن کس ونیسي.
په شهزاده سرای کې چاودنه پر داسې مهال شوې چې د اسعارو بازار او بانکونه د جمعې او شنبې پر ورځ تړلي ول او د یکشنبې پر ورځ هلته ګڼه ګوڼه زیاته وه.
