ویب ډیسک
د افغانستان کرکټ بورډ منلې، چې له ۱۹ کلونو ټيټ عمره لوبډلې یوه غړي او د کرکټ بورډ درې غړیو تېره اوونۍ په ویسټ انډیز کې د نړیوال جام له سیالیو وروسته په انګلستان کې د پناه غوښتنه کړې ده.
د کرکټ بورډ دوه سرچینو د نوم نه ښودلو پر ټینګار امریکا غږ ته څرګنده کړې، چې دغو کسانو د ویسټ انډیز له لوبې وروسته په انګلستان کې د ۴۸ ګړیو د پاتې کېدو له پرېکړې وروسته ژمنه کړې، چې بېرته خپل هېواد ته نه ستنیږي.
د امریکا غږ د راپور له مخې؛ د پناه غوښتوونکیو نومونه نه دي په ډاګه شوي او دا هم څرګنده نده، چې ولې یې افغانستان ته له ستنیدو ډډه وکړه.
افغانستان تېره اوونۍ له ۱۹ کلونو څخه د ټیټ عمره کرکټ لوبډلو په نړیوال جام کې څلورم ځای خپل کړی دی.
دا لومړی ځل ندی، چې د افغانستان له نولس کلونو څخه ټیټ عمره لوبډلې لوبغاړي بېرته هېواد ته له راستنېدو ډډه کوي؛ څو کاله مخکې هم پېنځه یا شپږ افغان لوبغاړیو په کاناډا کې د پنا غوښتنه کړې وه.
