ويب ډیسک
د امریکا یوې محکمې د ولسمشرجوبایډن ادارې ته دوه اونۍ نور مهلت ورکړی چې د افغانستان د کنګل شویو بانکي شتمنیو په اړه پرېکړه وکړي.
د راپورونو له مخې د نیویارک د منهاتن د محکمې قاضي سارا نیتبورن د امریکا د عدلیې وزارت ته د فبروري تر یوولسمې پورې وخت ورکړی څو د افغانستان د دې شتمنیو په برخه کې خپلې سپارښتنې وروسپاري.
تمه وه چې د امریکا حکومت د افغانستان د دې شتمنۍ په اړه خپلې سپارښتنې پرون (د سلواغې په اتمه نېټه) سپارلې وای.
د افغانستان بانک دا مالي شتمني د زمري په ۲۴مه پر افغانستان د طالبانو له واکمنېدو سره سم د نیویارک په فدرال بانک کې کنګل شوې.
د رویټرز خبري آژانس د راپور له مخې مېرمن نیتبورن د دې پیسو اندازه اوه میلیارد ډالره ښودلې ځکه د نوموړې په وینا پر متحدوایالتونو د ۲۰۰۱ کال د سپتمبر د ۱۱مې د پېښې د یوشمېر قربانیانو کورنیو د تاوان غوښتنه کړې، په داسې حال کې چې د دې شتمنۍ اصلي ارزښت ۹،۵ میلیارد ډالر اټکل شوی.
