د امریکا د هوايي ترافیک په زړو مخابراتي سیستمونو کې تخنیکي ستونزې؛ زرګونه الوتنې لغوه او ځنډېدلې

0
51

د امریکا د هوايي چلند فدرالي ادارې د دغه هېواد په ټولو هوايي ډګرونو کې د الوتنو د بندېدو لنډمهالی امر، څو ساعته وروسته بېرته لغوه کړی دی.

د راپورونو له مخې، د جمعې په ورځ د هوايي ترافیک د څارنې او اړیکو په سیستم کې د تخنیکي ستونزې له امله د امریکا له هوايي ډګرونو څخه د الوتکو الوتنې ودرول شوې.

د امریکا د ترانسپورټ وزیر شان ډافي ویلي، چې ستونزه د هوايي ترافیک د کنټرول په زړو او له وخته تېر شوو مخابراتي وسایلو او شبکو کې وه.

نوموړي زیاته کړې، که څه هم د الوتنو د بندېدو امر لغوه شوی، خو د الوتکو او عملې د ځایونو د ګډوډۍ له امله به د هوايي تګ راتګ عادي کېدل وخت ونیسي.

د الوتنو د څارنې د وېبپاڼې «فلایټ‌اوېر» د شمېرو له مخې، د جمعې په ورځ له ۴۵۰۰ ډېرې الوتنې لغوه شوې او شاوخوا ۷۰۰ نورې د شنبې ورځې لپاره هم لغوه شوې وې. دغه راز، د امریکا دننه، دغه هېواد ته د راتلونکو او ترې وتونکو له ۱۰ زرو ډېرې الوتنې ځنډېدلې دي.

د امریکا د کورني امنیت وزیر مارک‌وېن مولین ویلي، داسې نښې نشته چې دا ستونزه دې د سایبري برید یا مصنوعي ځیرکتیا له امله رامنځته شوې وي او د هغه په وینا، د خلکو ژوند له خطر سره نه و مخ شوی.

په ورته وخت کې، د اروپا د هوايي تګ راتګ د خوندیتوب ادارې ویلي، د امریکا د غوښتنې له مخې، د خپلو ۴۲ غړو هېوادونو له هوايي ډګرونو څخه امریکا ته تلونکې الوتنې هم په لنډمهالي ډول ځنډول شوې وې.

د کاناډا د هوايي تګ راتګ ادارې هم د امریکا د ستونزې له امله په خپلو څلورو مهمو هوايي ډګرونو کې د الوتنو د تنظیم لپاره ځانګړي تدابیر نیولي او مسافرو ته یې د ځنډونو د احتمال خبر ورکړی دی.