د پاکستان حکومت د بهرنیو رسنیو لپاره د کارکوونکو د فعالیتونو د تنظیم په موخه نوي مقررات نافذ کړي، چې له مخې یې د نړیوالو رسنیو لپاره کارکوونکي خبریالان او نور اړوند کسان باید له حکومت سره ثبت شي، رسمي پېژندپاڼه (اکرېډېټېشن) ترلاسه کړي او د هېواد ډېرو سیمو ته د راپور جوړولو لپاره له مخکې اجازه واخلي.
د ۲۰۲۶ کال د بهرنیو رسنیو د اسانتیاوو د لارښود له مخې، دا مقررات یوازې پر بهرنیو خبریالانو نه، بلکې پر هغو پاکستاني خبریالانو، خپلواکو خبریالانو، سیمهییزو همکارانو، ژباړونکو، انځور اخیستونکو، تولیدي شرکتونو او نورو هغو کسانو هم پلي کېږي چې له نړیوالو رسنیو سره په هر ډول دنده ترسره کوي.
د دغو مقرراتو له مخې، اړوند کسان باید د اطلاعاتو او خپرونو وزارت د بهرنۍ عامه اړیکو له څانګې سره لومړی ثبت شي او له هغې وروسته رسمي اکرېډېټېشن ترلاسه کړي. همدارنګه، که یو خبریال غواړي له اسلاماباد، لاهور او کراچۍ څخه بهر د راپور جوړولو لپاره سفر وکړي، باید مخکې له مخکې د نه اعتراض سند (NOC) ترلاسه کړي.
دا بدلونونه داسې مهال اعلان شوي چې د پاکستان حکومت د ازاد کشمیر د ټاکنو او امنیتي وضعیت په اړه د ځینو نړیوالو رسنیو پر راپورونو نیوکې کړې وې. د چارواکو په وینا، یو شمېر خبریالانو د اړینو اجازو پرته سیمې ته سفر کړی و، له همدې امله هغوی ته لارښوونه شوې چې د راپور جوړولو لپاره به له مخکې رسمي اجازه اخلي.
په نوو لارښوونو کې راغلي چې ټول هغه کسان چې له نړیوالو یا بهرنیو چاپي، برېښنايي، ډیجیټلي او ټولنیزو رسنیو سره کار کوي، باید د اطلاعاتو وزارت له اړوندې څانګې سره ثبت وي. همدارنګه، نوی اکرېډېټېشن سیستم هم معرفي شوی چې له مخې به خبریالانو ته د QR کوډ لرونکې رسمي پېژندپاڼې ورکول کېږي.
د سفر اړوند شرطونو کې ویل شوي چې د مستندو فلمونو، راپورونو، فلمونو او نورو رسنیزو تولیداتو لپاره له ټاکل شویو ښارونو بهر د تګ پر مهال به مخکې له مخکې اجازه اخیستل لازمي وي. د رسنیو ځینې فعالان باور لري چې دا شرط ښايي د ناڅاپي پېښو د چټکې خبري پوښښ بهیر له ستونزو سره مخ کړي.
په دغو مقرراتو کې حکومت ته دا واک هم ورکړل شوی چې د اړتیا په صورت کې د ثبت یا اکرېډېټېشن بهیر وځنډوي یا یې لغوه کړي، خو د دې پرېکړو د څرنګوالي او معیارونو په اړه بشپړ وضاحت نه دی ورکړل شوی.
د رسنیو د ازادۍ د ملاتړ د یوې ادارې مشر اقبال خټک ویلي، که څه هم دغه مقررات د رسنیو د تنظیم په نوم وړاندې شوي، خو د ده په اند د خبریالانو پر تګ راتګ او مسلکي فعالیتونو محدودیتونه رامنځته کوي. هغه اندېښنه څرګنده کړې چې د “ملي امنیت”، “عامه نظم” او “د دولت نظریه” په څېر اصطلاحات ښايي د رسنیو پر فعالیتونو د محدودیت لپاره وکارول شي.
د پاکستان حکومت تر اوسه دا مقررات د رسنیو د چارو د همغږۍ او تنظیم لپاره اړین ګام بولي، خو د رسنیو د ازادۍ یو شمېر ملاتړي یې د عملي اغېزو په اړه اندېښنې څرګندوي.