د سویلي وزیرستان د سراروغه سیمې کې شپږ پولیس سرتېري، چې د امنیه قوماندان (اېساېچاو) احمد شاه په ګډون تښتول شوي وو، بېرته روغ او خوندي خوشې شوي دي.
د سرچینو د معلوماتو له مخې، د دغو سرتېرو د خوشې کېدو لپاره د سیمې مشرانو د منځګړیتوب مهم رول ادا کړی او د دواړو لورو ترمنځ یې خبرې اترې کړې دي. ویل کېږي چې د همدې خبرو اترو له بریالیتوب وروسته ټول تښتول شوي پولیس سرتېري خپلو کورونو ته په خوندي ډول ستانه شوي دي.
د پولیسو د سرچینو په وینا، وسلوالو د سراروغه په سیمه کې د امنیه قوماندان احمد شاه په ګډون شپږ پولیس سرتېري نیولي او وروسته یې له ځان سره بیولي وو، چې تر هغې وروسته یې د خلاصون لپاره هڅې پیل شوې.
سرچینې زیاتوي چې د سیمې د مشرانو د پرلهپسې هلو ځلو او خبرو اترو په پایله کې د دغو پولیسو خوشې کېدل ممکن شول، خو د خوشې کېدو لپاره د هر ډول احتمالي شرطونو یا هوکړو په اړه تر اوسه رسمي معلومات نه دي خپاره شوي.
